អ្នកនាងសុគន្ធ និសា វ័យកាន់តែច្រើន ចង់សម្រាកពីអាជីពនេះហើយ

ក្នុងជំនួបផ្ទាល់ជាមួយសុគន្ធ និសា កាលពីថ្ងៃទី១៩ ខែកក្កដា ឆ្នាំ២០២០ តារាហង្សមាស រូបនេះ បានឲ្យដឹងថា នាងនឹងផ្អាកការថតសម្ដែងភាពយន្ដមួយរយៈសិន ព្រោះថាការថតរឿងមិនមែនដូចថត MV នោះទេ គឺមានភាពហត់នឿយច្រើនជាងឆ្ងាយណាស់ ហើយឈុតឆាកប្លង់មួយចំនួនក៏មានថតដល់យប់ជ្រៅៗដែរ អីចឹងនាងអាចនឹងមិនមានគម្រោងថតរឿងថ្មីៗទៀតឡើយ។

តារាតូចច្រឡឹងរូបនេះ បានឲ្យដឹងថា រឿងចុងក្រោយដែលនាងបានសម្ដែងជាមួយលោកឆន សុវណ្ណរាជ នោះ បានថតចប់ហើយ ដោយប្រើពេលដល់ទៅ៥ខែឯណោះ ហើយភាពយន្ដនោះជាការទិញសិទ្ធិ (License)​ពីបរទេសផងដែរ។ នាងថា ដោយសារស្រលាញ់អាជីពសិល្បៈ ទាំងចម្រៀង និងភាពយន្ដ អីចឹងហើយបានជាចង់បន្សល់ស្នាដៃទាំងនេះសម្រាប់ថ្ងៃក្រោយ។ ប៉ុន្ដែពេលនេះនាងមានវ័យកាន់តែច្រើនទៅហើយ​អីចឹងឆាប់ហត់នឿយជាងមុន ទើបគិតថា ចង់ឈប់សម្រាកពីអាជីពភាពយន្ដ ប៉ុន្ដែចម្រៀងនៅតែបន្ដចេញច្រៀងសម្ដែង និងថតបទថ្មីៗដដែល។

សុគន្ធ និសា បានសម្រុកថតភាពយន្ដដល់ទៅ៤រឿងជាប់គ្នា ក្នុងតំណែងជាតួឯក គឺមានដូចជារឿង ”សិសិររដូវក្នុងបេះដូង”, ”រាជិនីភូមិគ្រឹះ”, ”ព្រះវេស្សន្ដជាតក” និងរឿង ”ចំណតថ្មីនៃសុភមង្គល” ខណៈដែលអំឡុងនៅផលិតកម្មថោន ធ្លាប់ធ្លាយព័ត៌មានថា នាងបានថតរឿង ”ចងចាំ” ជាមួយលោកករុណា ពេជ្រ តែភាពយន្ដនោះបែរជាប់គាំង មិនទាន់ឃើញដាក់បញ្ចាំងទៅវិញ។

ទាក់ទងនឹងការបាត់ប្រាក់ចំណូលពីអាជីពចម្រៀង ដោយសារតែការកូវីដ-១៩នេះ សុគន្ធ និសា បានឲ្យដឹងថា នាងក៏ដូចតារាផ្សេងៗទៀតដែរ គឺធ្លាក់ចំណូលដូចគ្នា។ ប៉ុន្តែនាងថា មិនអាចនិយាយថាស្ដាយលុយ ព្រោះកម្មវិធីគេលុបចោលនោះទេ គឺមានតែបន្ដការប្រុងប្រយ័ត្ន និងចូលរួមទាំងការពារខ្លួនទាំងអស់គ្នាឲ្យរួចផុតពីជំងឺដ៏សាហាវមួយនេះ។ នាងថាថ្វីត្បិតតែការប្រគំតន្ត្រីតាមខេត្ត ត្រូវបានលុបចោលអស់មែន ប៉ុន្ដែនាងនៅតែមានភាពមមាញឹកច្រៀងសម្ដែងតាមឆាកទូរទស្សន៍ និងមុខរបរក្រៅពីអាជីពសិល្បៈរបស់នាង ដូចជា បើកហាងលក់គុយទាវខ្ចប់​ ជាដើម។

សុគន្ធ និសា បានរៀបការកាលពីថ្ងៃទី១ ខែធ្នូ ឆ្នាំ២០១៧​ជាមួយអាណិកជនខ្មែរ​មកពីរដ្ឋឡូវែលល៍ សហរដ្ឋអាមេរិក​ លោកចៅ សម្បត្តិ ដែលជានាយកផ្នែកប្រតិបត្តិរបស់ក្រុមហ៊ុនមែនញូឡាយ នៅកម្ពុជា តែក្រោយការជិត៣ឆ្នាំនេះ និសា នៅមិនទាន់ពពោះកូនដំបូងឡើយ។

ប៉ុន្ដែអតីតតារាចម្រៀងរស្មីស្ទឹងសង្កែ,​ Spark Music និងថោន រូបនេះ មានសំណាងជាងតារាមួយចំនួន ព្រោះនាងត្រូវបានស្វាមីអនុញ្ញាតឲ្យនាងលេងសិល្បៈថតសម្ដែង ច្រៀងរាំពេញទំហឹងតែម្ដង ហើយលោកសម្បត្តិ ហៅសាំបា ក៏មិនដែលដើរតាមឆាកតន្រ្ដីមួយចំនួនតាមនិសា ដូចគូស្នេហ៍តារាផ្សេងៗទៀតដែរ។

និសា អះអាងថា នាងធ្លាប់ប្រាប់ហេតុផលទៅសា្វមីរឿងមិនអាចបញ្ចប់អាជីពសិល្បៈត្រឹមនេះបានទេ​ព្រោះនាងបានតស៊ូជាង១០ឆ្នាំមកហើយ ហេតុនេះបានជាប្ដីនាងមិនហាមឃាត់នាងច្រៀងសម្ដែងនោះទេ ហើយប្ដីប្រពន្ធរបស់នាងមានទំនុកចិត្តគ្នាល្អណាស់។

ប៉ុន្ដែទាក់ទងរឿងគម្រោងចេញទៅរស់នៅសហរដ្ឋអាមេរិក​តាមស្វាមីនោះ តារាហង្សមាសរូបនេះ​នៅតែមិនច្បាស់ដដែល​ដោយនាងធ្លាប់ប្រាប់ថា មិនទាន់ទទួលបានសិទ្ធិទៅរស់នៅស្របច្បាប់ (Visa)​ ពីស្ថានទូតអាមេរិកឡើយ៕ ហ៊ឹម វិចិត្រ