ភ្នំពេញ ៖ រយៈពេល ២ឆ្នាំមកហើយ ដែលកែវ ពេជ្រពិសី ដាក់គោលដៅយកកូនស្រី ប៉ុន្ដែគិតមកដល់មុនដំណាច់ឆ្នាំ២០២៥ នេះ លទ្ធផលនៅតែសូន្យ ខណៈដែលកូនច្បងរបស់នាង ឈ្មោះ Dura Peou មានអាយុជាង៤ឆ្នាំ ទៅហើយ ។ ពេជ្រពិសី ថាចិត្តនាងនិងស្វាមី ដូចគ្នា គឺចង់បានកូនស្រី ប៉ុន្ដែរហូតមកដល់ពេលនេះ នាងនៅតែមិនអាចពពោះកូនទី២ បានមែន ។
កែវ ពេជ្រពិសី ប្រាប់អ្នកយកព័ត៌មាន «នគរធំ» កាលពីពេលថ្មីៗនេះថា «អត់ទាន់បានមួយទៀតទេបង។ និយាយទៅ ចិត្តចង់បានកូនស្រីមែន ប្ដីខ្ញុំក៏អ៊ីចឹងដែរ តែធ្វើម៉េចបើឥឡូវបានតែកូនប្រុសមួយដដែលហ្នឹង» ។
មូលហេតុដែលកែវ ពេជ្រពិសី និងស្វាមី ចង់បានកូនស្រីដូចគ្នា ព្រោះតែលោកពៅ សម្បត្តិ អាណិកជនខ្មែរ មកពីកាណាដា ធ្លាប់មានភរិយាមុន ក៏បានកូនសុទ្ធតែប្រុសដែរ អីចឹងហើយបានជាលោកប៉ងយកកូនស្រី។ ចំណែកពេជ្រពិសី វិញ កូនទី១ ប្រុស អ៊ីចឹងដាច់ខាតបើបានកូនទី២ ច្បាស់ណាស់ថា ចិត្តនាងប្រាកដជាចង់បានកូនស្រី ច្រើនជាងកូនប្រុសបែបនេះហើយ តែពេលនេះ អត់ទាន់បានសម្រេចទេ ។
គូររំលឹកថា កែវ ពេជ្រពិសី បានភ្ជាប់ពាក្យជាមួយលោកពៅ សម្បត្តិ កាលពីថ្ងៃទី១៧ ខែឧសភា ឆ្នាំ២០២០ ហើយនាងមានគម្រោងរៀបការនៅឆ្នាំ២០២១ តែបានលុបចោលវិញដោយសារពេលនោះ ផ្ទុះកូវីដ។ ជំនួសឲ្យរៀបមង្គលការ ពេជ្រពិសី បានសម្រាលកូន កាលពីថ្ងៃទី១៤ ខែកញ្ញា ឆ្នាំ២០២១ ដោយនាងអះអាងថា ចិត្តនាងបើរៀបការ ចង់ការមុនមានកូន ប៉ុន្ដែបើមានកូនហើយ នាងមិនចង់រៀបការនោះទេ តែអាចយកកូនថែម ឲ្យហើយ ព្រោះនាងនិងស្វាមី ក៏ធ្លាប់ឆ្លងកាត់ជីវិតអាពាហ៍ពិពាហ៍ដូចគ្នា និងពេលនេះ មានវ័យជ្រេបន្ដិចដូចគ្នាទៅហើយដែរ អ៊ីចឹងមិនអាចពន្យារពេលយកកូនទេ ។
សូមបញ្ជាក់ថា កែវ ពេជ្រពិសី បានផ្អាកថតសម្ដែងភាពយន្ដ ជាង១០ឆ្នាំទៅហើយ ដោយងាកទៅរកស៊ីបើកហាង «កែវ ពេជ្រពិសី សម្អាងការ» ប៉ុន្តែក៏មានផលិតករខ្លះ ហៅនាងថតដែរ តែមិនសមទៅនឹងតួដែលនាងចង់សម្ដែង ដូចជាឲ្យធ្វើតួម៉ែ ជាដើម ទើបនាងមិនព្រមលេង។ ប៉ុន្ដែតាំងពីផ្ទុះកូវីដ មកដល់ពេលនេះ ហាងសម្អាងការរបស់នាង ដំណើរការមិនល្អទេ ហើយនាងបានប្រកាសលក់សម្អាងការរបស់ខ្លួន តាំងពីដើមឆ្នាំ២០២៤ តែរហូតមកដល់ពេលនេះ នាងថានៅតែលក់មិនដាច់។
កែវ ពេជ្រពិសី ថ្លែងថា «សម្អាងការហ្នឹង ខ្ញុំលក់អត់ទាន់ដាច់ទេបង។ មានគេសួរដែរ តែគេចង់ទិញជាផ្នែកអីវ៉ាន់ណាមួយរបស់សម្អាងការ ប៉ុន្ដែចិត្តខ្ញុំចង់លក់ជាកញ្ចប់ទាំងអស់ អ៊ីចឹងហើយបានជាមិនត្រូវគ្នា»។
ក្រៅពីមិនទាន់បានកូនស្រីដូចបំណង កែវ ពេជ្រពិសី ដែលភ្ជាប់ស្នេហាជាមួយលោកពៅ សម្បត្តិ ជាង៥ឆ្នាំនេះ នាងថា មិនទាន់បានទៅដល់ទឹកដីកាណាដា ទេ ប៉ុន្ដែនៅពេលកូនប្រុសមានអាយុ៥ឆ្នាំ នឹងចេញចូលកាណាដា ស្រុកទី២ ខាងប្ដី ឲ្យបានញឹកញាប់ ដើម្បីងាយបានសញ្ជាតិកាណាដា ។ ចំណែករឿងយកកូននោះ នាងថា មិន មែន១ ក៏មិនមែន២ ប៉ុន្ដែចិត្តនាងចង់បានកូន ៣នាក់ ទើបគិតថា គ្រប់គ្រាន់ ហើយចិត្តនាង គ្រាន់តែចង់បង្កើតគ្រួសារសាមញ្ញធម្មតាមួយប៉ុណ្ណោះ ៕