ថ្វីដ្បិតតែ ហ្ស៊ីដានបានជួយឲ្យក្លឹបស្តេចដំរី ស Real Madrid ឈ្នះ ពានឆេមពានលីក៣ រដូវកាលជាប់ៗគ្នា យ៉ាងណាក៏ដោយ ទីបំផុតលោកបានធ្វើឲ្យមានការភ្ញាក់ផ្អើលមួយកាលពីរាត្រីថ្ងៃព្រហស្បតិ៍ទី ៣១ ឧសភា បន្ទាប់ពីលោកធ្វើសន្និសីទកាសែតប្រកាសចាកចេញពីក្លឹបជើងឯកពានឆេមពានលីក១៣ សម័យកាលមួយនេះ។
ក្នុងសន្និសីទកាសែតកាលពីម្សិលមិញ បុរសសញ្ជាតិបារាំងបានលើកហេតុផលយ៉ាងខ្លីថា៖ “បន្ទាប់ពី៣ឆ្នាំ ខ្ញុំគិតថាជាពេលត្រូវចាកចេញហើយ។ វាពិតជាពិបាកបន្តធ្វើជាគ្រូបង្វឹក ក្រោយចំណាយរយៈពេលច្រើនគួរសម។ ខ្ញុំក៏មិនគិតច្បាស់ថា ពួកយើងអាចបន្តឈ្នះទៀតឬយ៉ាងណាទេ។
ទាក់ទងទៅនឹងការប្រកាសរបស់ ហ្ស៊ីដាន លោក Perez ប្រធានក្លឹបបានសំដែងការភ្ញាក់ផ្អើលយ៉ាងខ្លាំង។
លោក Perez បាននិយាយថា៖ “ក្រោយឈ្នះ ឆេមពានលីកខ្ញុំមិនបានគិតចថាគាត់សម្រេចចិត្តបែបនេះឡើយ”។ជាមួយគ្នានេះដែរលោកនៅតែសង្ឃឹមថា លោក ហ្ស៊ីដាន នឹងត្រលប់មកដឹកនាំក្លឹបនាពេលអនាគត។
រយៈពេលដ៏ខ្លីហ្ស៊ីដានបានជួយ Real Madrid ឈ្នះពាន៩ក្នុងនោះមាន៖ ពានព្រីមេរ៉ាលីហ្គាម្ដងពានស៊ុបពើរខាប់ម្ដង ពានឆេមពានលីក ៣ដង ពានស៊ុបពើខាប់២ដង និងពានFIFA Super Cup ២ដង៕