អ្នកលក់អនឡាញល្បីឈ្មោះ គឺអ្នកនាង Siv Mey ដែលគ្រប់គ្នាស្គាល់ថាជាម្ចាស់ផេក Sivmey Online shop និងជាម្ចាស់ផលិតផល Ei Ei បានប្រគល់ថវិកាចំនួន២ម៉ឺនដុល្លារ ជូនដល់អាជ្ញាធរស្រុកខ្សាច់កណ្ដាល ខេត្តកណ្ដាល ដើម្បីជួយដាក់បង្គោលភ្លើងតាមបណ្ដោយផ្លូវកៅស៊ូ ពីខាងវិហារសួគ៌ ទៅខេត្តព្រៃវែង។
ការប្រគល់ជូននេះ គឺបានធ្វើឡើងកាលពីល្ងាចថ្ងៃទី២០ កក្កដា ឆ្នាំ២០២០ ដើម្បីឆ្លើយតបនឹងការអំពាវនាវរបស់អាជ្ញាធរស្រុកខ្សាច់កណ្ដាល ក្នុងការដាក់បង្គោលនៅតាមដងផ្លូវនោះ។ ការបរិច្ចាគនេះ បានធ្វើឲ្យអ្នកនាង Siv Mey ទទួលបានការសរសើរទៀតហើយ ដោយសារការបរិច្ចាគរបស់អ្នកនាងមួយលើកនេះ ក៏ជាចំនួនមួយច្រើន ហើយក៏ចាត់ទុកថា នៅជាការរួមចំណែកជួយជាតិ និង ពលរដ្ឋផងដែរ ដើម្បីឲ្យតាមផ្លូវពីខាងវិហាសួគ៌ ទៅខេត្តព្រៃវែង មានភ្លើងបំភ្លឺផ្លូវ ខណៈដែលភាពជាក់ស្ដែងនៅតាមដងផ្លូវនោះក៏មិនទាន់មានបង្គោលភ្លើងគ្រប់គ្រាន់។
គួរកត់សម្គាល់ថា អ្នកនាង Siv Mey ត្រូវគេកត់សម្គាល់ថា សកម្មខ្លាំងក្នុងការជួយដល់ទុរគតជនតាមស្រុកតាមភូមិ អ្នកនាង Siv mey មិនមើលរំលងនូវវត្តអារ៉ាមមួយចំនួនដែលមានការខ្វះខាត ដោយតែងជួយឧបត្ថមជាថវិកា និងគ្រឿងឧបភោគបរិភោគផ្សេងៗជាច្រើនសម្រាប់ជាចង្ហាន់ដើម្បីផ្គត់ផ្គង់ព្រះសង្ឃដែលគង់ប្រចាំនៅក្នុងវត្តបានមួយរយៈពេលផងដែរ។
មិនតែប៉ុណ្ណោះ អ្នកនាងក៏បានចំណាយថវិការផ្ទាល់ខ្លូនដើម្បីចេញមុខធ្វើគម្រោងសាងសង់ស្ពាន និងផ្លូវលំផ្សេងៗនៅតាមទីជនបទ ដែលដាច់ស្រយាល ពុំទាន់មានការអភិវឌ្ឍដើម្បីជួយសម្រួលដល់ការធ្វើដំណើររបស់ប្រជាជននៅតាមភូមិឃុំ គួរឱ្យសរសើរ។
ជាងនេះទៅទៀត អ្នកនាងក៏មិនដែលរំលងក្នុងការផ្ដល់ជំនួយជួយដល់ក្រុមកងប្រដាប់អាវុធ ដែលបម្រើការពារដល់សុខសន្តិភាពពលរដ្ឋដែលលះបង់ជួយប្រទេស។
ពិសេសជាងនេះទៅទៀត អ្នកនាងតែងតែផ្ដល់ជំនួយជារឿយៗដល់សាខាកាកបាទក្រហមកម្ពុជា មិនថាក្នុងចំនួនទឹកប្រាក់តិចឬច្រើននោះទេ ដោយការបរិច្ចាគម្ដងៗក៏មានចំនួនច្រើនៗ ដូចជាគ្រាន់តែជួយកាកបាទក្រហមខេត្តកណ្ដាលតែមួយកន្លែង គឺ៤ម៉ឺនដុល្លារហើយ ដោយមិនទាន់រាប់បញ្ចូលការបរិច្ចាគជួយដល់ផ្នែកផ្សេងៗ៕
