ភ្នំពេញ ៖ បុរសម្នាក់កំពុងតែជិះម៉ូតូធ្វើដំណើរតាមផ្លូវសុខៗ ស្រាប់តែមានបុរសម្នាក់សង្ស័យស្រវឹងស្រាជិះម៉ូតូឆ្លងកាត់ទទឹងផ្លូវ ជ្រុលទៅបុកចំពីមុខពេញទំហឹង បណ្តាលឲ្យរងរបួសតិចតួច តែភ្លាមៗនោះខាងម៉ូតូបង្កមានបុរសម្នាក់បានមកអះអាងថា ស្គាល់គ្នា បានជួយលើកម៉ូតូខាងបង្កឲ្យជិះរត់គេចខ្លួនបាត់ ហេតុការណ៍នេះបានកើតឡើងនៅវេលាម៉ោង១១និង៣០នាទីយប់ថ្ងៃទី១៤ ខែ វិច្ឆិកា ឆ្នាំ២០១៧ ទល់មុខមន្ទីរពេទ្យមិត្តភាពខ្មែរ-សូវៀត ផ្លូវ២៧១ សង្កាត់ទំនប់ទឹកខណ្ឌចំការមន។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញបុរសរងគ្រោះបានជិះម៉ូតូ ម៉ាកហុងដា ឃ្លីក ពណ៌ខ្មៅ ពាក់ស្លាកលេខភ្នំពេញ 1BG 4553 បានធ្វើដំណើរតាមផ្លូវ ២៧១ ក្នុងទិសដៅត្បូងទៅជើង ខណៈមកដល់ចំណុចកើតហេតុ មុខមន្ទីរពេទ្យមិត្តភាពខ្មែរ-សូវៀត ក៍ស្រាប់តែមានបុរសបានជិះម៉ូតូ ម៉ាកសង់ប៊ិច ពណ៌ខ្មៅ មិនចាំស្លាកលេខ ជិះចេញពីមន្ទីរពេទ្យ ឆ្លងកាត់ទទឹងផ្លូវ ពីលិចទៅកើត ក្នុងល្បឿនលឿន សង្ស័យស្រវឹងស្រាផងនោះ បានជ្រុលទៅបុកម៉ូតូហុងដា ឃ្លីក ចំពីមុខពេញទំហឹង បណ្តាលឲ្យរងការខូចខាតម៉ូតូទាំងសងខាងនិងរងរបួសមនុស្សតិចតួច។
ភ្លាមៗនោះដែរ ក៍ស្រាប់តែមានបុរសម្នាក់ មិនដឹងថាចេញពីណានោះទេ ជិះម៉ូតូម៉ាកហុងដា ឌ្រីមស៊េរីឆ្នាំ ២០១៦ មកឈប់ម៉ូតូ រួចហើយបានជួយលើកម៉ូតូខាងបង្ក ហើយអះអាងថាស្គាល់គ្នា រួចហើយបានឲ្យខាងម៉ូតូបង្កជិះគេចខ្លួនបាត់ស្រមោល។
ក្រោយពេលកើតហេតុ នៅសល់តែម៉ូតូខាងរងគ្រោះ ហើយនិងអ្នកអះអាងខាងម៉ូតូបង្កនៅដោះស្រាយគ្នា តែដោយសារតែខាងម៉ូតូរងគ្រោះ មិនចង់មានរឿងវែងឆ្ងាយ បានលើកម៉ូតូជិះចេញទៅបាត់ទៅ៕
