តារាចម្រៀងរបស់ផលិតកម្មរស្មីហង្សមាស ២ដួងទៀតហើយ គឺអ្នកនាងសុគន្ធ និសា និងកញ្ញាវី ឌីណែត បានឆ្លងជំងឺកូវីដ-១៩ ហើយពេលនេះ អ្នកទាំង២ ត្រូវបានក្រុមគ្រូពេទ្យនាំទៅមន្ទីរព្យាបាលកូវីដ-១៩ កម្រិតស្រាល (អតីតសណ្ឋាគារអាំងទែរកុងទីណង់តាល់)។
អ្នកនាងសុគន្ធ និសា បានបង្ហោះសារថា “នាងខ្ញុំ សុគន្ធនិសា (sokunnisa ) បានធ្វើតេស្តកូវីដ19 ឥឡូវនេះ ជម្រាបជូនដល់បងប្អូនជាសាធារណៈថា ខ្ញុំបាន positive ហើយ គឺមានមេរោគនេះហើយ អីចឹងសូមបងប្អូនទាំងអស់មានការប្រុងប្រយ័ត្នឲ្យបានខ្ពស់ដើម្បីសុវត្តិភាព ខ្លួនឯងនឹងក្រុមគ្រួសារ សូមជូនពរឲ្យបងប្អូនទាំងអស់ឆ្លងផុតពីជំងឺនេះ
សូមទោសបងប្អូនដែលខ្ញុំអត់បានឆ្លើយតប អធ្យាស្រ័យផងណាបងប្អូន ក្នុងចំណោមអ្នកផ្ទះខ្ញុំ ៧ នាក់ ដែលបានធ្វើតេស្តដោយក្រុមលោកគ្រូអ្នកគ្រូពេទ្យជំនាញ គឺមានកើតតែខ្ញុំម្នាក់តែប៉ុណ្ណោះ អ្នកផ្ទះខ្ញុំអត់មានទេ តែក៏ត្រូវផ្តាច់ខ្លួន ១៤ថ្ងៃដែរ ហើយខាងផ្ទះម្តាយខ្ញុំ គឺអត់ពាក់ព័ន្ធឡើយ”។
អ្នកនាងសុគន្ធ និសា បានបង្ហោះសារបន្ថែមទៀតថា “នាងខ្ញុំសុគន្ធ និសា សូមគោរពថ្លែងអំណរគុណដល់សម្តេចតេជោ (លោកពុក) សម្តេចកិត្តិព្រឹទ្ធបណ្ឌិត (លោកម៉ែ) ថ្នាក់ដឹកនាំទាំងអស់ និងក្រុមលោកគ្រូអ្នកគ្រូពេទ្យជំនាញដែលបានយកចិត្តទុកដាក់ ទាក់ទងនឹងសុខភាពរបស់នាងខ្ញុំ ក៏ដូចជាក្រុមការងារហង្សមាសទាំងអស់ និងក្រុមគ្រួសាររបស់នាងខ្ញុំ សូមបងប្អូនទាំងអស់ ប្រុងប្រយ័ត្នឲ្យបានខ្ពស់ ដើម្បីបានសុខទាំងអស់គ្នា ហើយក៏អាចជាការទប់ស្កាត់ ជួយសម្រាលបន្ទុកដល់ថ្នាក់ដឹកនាំ និង ក្រុមលោកគ្រូអ្នកគ្រូពេទ្យ នឹងសម្រាលទម្ងន់ស្ថានភាព ក្នុងប្រទេសរបស់យេីងផង”។
ចំណែកវី ឌីណែត ក៏បានបង្ហោះសារដែរថា “មុននេះនាងខ្ញុំបានទទួលលិទ្ធផលហេីយ គឺនាងខ្ញុំបានវិជ្ជមានកូវីត19 ហើយ អីចឹងនាងខ្ញុំសូមសំណូមពរដល់បងប្អូនទាំងឡាយណាដែលបានប៉ះពាល់នាងខ្ញុំ សូមមេត្តាទៅធ្វើតេស្តរកមេរោគកូវីតទាំងអស់គ្នាក៏សូមអធ្យាស្រ័យផងបងប្អូន”។
ក្រោយបង្ហោះសារ អ្នកសិល្បៈរួមអាជីព អ្នកគាំទ្រសុទ្ធតែបានComment ជូនពរតារាចម្រៀងទាំង២ដួង ឲ្យផុតពីជំងឺដ៏កាចសាហាវនេះ និងសូមឲ្យពួកគេកុំតក់ស្លុត ឬបាក់ទឹកចិត្ត។
គួបញ្ជាក់ថា កាលពីម្សិលមិញនេះ លោកណុប បាយ៉ារិទ្ធ តារាចម្រៀងរបស់ផលិតកម្មហង្សមាស ក៏បានឆ្លងជំងឺកូវីដ-១៩ នេះផងដែរ៕
