ភ្នំពេញ ៖ ខេម មិនទាន់វិលរកឆាកតន្រ្ដីវិញទេ តាំងពីផ្អាកច្រៀងរាំ ក្រោយមានការផ្ទុះអាវុធតាមព្រំដែនកម្ពុជា-ថៃ បង្កដោយសៀម ហើយលោកសុណារិន ជាតារាម្នាក់ដែលបានចេញសារថ្កោលទោសសៀម យ៉ាងសកម្មផងដែរ ។ ប៉ុន្ដែអំឡុងពេលដែលខេម បានផ្អាកច្រៀងរាំ ជាង១ខែនេះ គេឃើញភរិយាសំណព្វចិត្តរបស់លោក អ្នកនាងស្រីកា បានតាមខេម ស្អិតតែម្ដង គ្រប់សកម្មភាពទាំងអស់ ហើយអ្នកទាំងពីរ ក៏បង្ហាញពីភាពផ្អែមល្ហែមគ្នាខ្លាំង រហូតតារារួមអាជីពខ្លះ ច្រណែនទៀតផង។ សកម្មភាពរបស់ខេម ត្រូវប្រពន្ធដើរតាម សឹងតែគ្រប់ជំហានបែបនេះ នាំឲ្យលោកខេម មិនសូវហ៊ានស្និតស្នាលជាមួយ Fan ស្រីៗឡើយ ព្រោះខ្លាចប្រពន្ធ ឆេះដុំ ។
សមាជិកក្រុមបាល់ទាត់តារាកម្ពុជា ធ្លាប់បង្ហើបថា ខេម ជាបុរសដែលមិនងាយប្រចណ្ឌភរិយាផ្ដេសផ្ដាសទេ ពោលគឺពួកគេអាចស្និទ្ធស្នាល ថត Selfie ជាមួយអ្នកនាងកា តាមចិត្តចង់ ក៏លោកខេម មិនដែលហួងហែងប្រពន្ធដែរ។
សូមបញ្ជាក់ថា ខេម មិនទាន់ផ្ដោតលើការចេញបទសម័យថ្មីៗទេ តាំងពីផ្ទះសង្រ្គាមតាមតំបន់ព្រំដែនកម្ពុជា-ថៃ ប៉ុន្ដែបទ «ឈាមខ្ញុំជាខ្មែរ» ត្រូវបានគេនិយមយកមកបង្ហោះ ភ្ជាប់ជាមួយកងទ័ពសៀមឈ្លានពាន ពេញបណ្ដាញសង្គម ព្រោះត្រូវនិងសកម្មភាពតាមតំបន់ព្រំដែន នាពេលបច្ចុប្បន្ន បើទោះជាបទរបស់ខេម មួយនេះ ចេញតាំងពីមុនផ្ទះសង្រ្គាមឈ្លានពានដោយទ័ពសៀម ក្ដី ។
គួររំលឹកថា ខេម បានចាប់ដៃអ្នកនាង ស្រីកា អាណិកជនខ្មែរ នៅបារាំង ជិត១០ឆ្នាំមកហើយ ដែលបច្ចុប្បន្ន ភរិយាខេម រស់នៅស្រុកខ្មែរ តាមលោក។ ខេម ធ្លាប់ប្រាប់អ្នកយកព័ត៌មានយើងថា លោកមានមោទនភាពដែលបានប្រពន្ធល្អ ទោះជានាងរស់នៅប្រទេសបារាំងតាំងពីតូចក្ដី ប៉ុន្ដែប្រពន្ធលោកស្រលាញ់ប្រទេសខ្មែរ និងវប្បធម៌ខ្មែរ ខ្លាំងណាស់ តែនៅពេលសួរដល់រឿងរៀបការ លោកខេម បែរជានិយាយដោយស្ទាក់ស្ទើរ មិនច្បាស់លាស់ទៅវិញ ដោយម្ដងថា នឹងរៀបចំឆាប់ៗ និងជូនកាលថា មិនចង់និយាយទុកមុន ។
មជ្ឈដ្ឋានមហាជន មើលឃើញថា ខេម មិនសូវលេចធ្លោខ្លាំង នៅ Galaxy ទេ តាំងពីព្រាប សុវត្ថិ និងខេមរៈ សិរីមន្ដ មករួមទ្រនំ ហើយពេលនេះ ការចាប់ដៃជាមួយនាង តន់ ច័ន្ទសីម៉ា ក៏រយាលៗ មិនសម្រុកដូចមុនឡើយ ។ យ៉ាងណា គេរង់ចាំមើលថា ខេម នឹងអាចលេចធ្លោក្នុងបទចម្រៀងប្រពៃណីខ្មែរ ក្នុងពិធីបុណ្យភ្ជុំបិណ្ឌ នៅចុងខែកញ្ញា នេះដែរឬយ៉ាងណា ?
ក្រៅពីខេម តារាដែលយកប្រពន្ធអាណិកជនខ្មែរ នៅបរទេស មានដូចជាលោកខៀវ សំភេទ, ស៊ុក សុភា, នៅ ស៊ីនឿន, រិន សាវ៉េត, ហង្ស ឈា, យស បូវណ្ណៈ, សុវណ្ណ មុន្នី និងខៃ ប្រសិទ្ធ ជាដើម ៕