ភ្នំពេញ ៖ តាមរយៈការបង្ហាញខ្លួនចុងក្រោយ កាលពីពេលថ្មីៗនេះ ក្នុងពិធីសម្ពោធខ្សែភាពយន្ដខ្នាតធំមួយ ឱក សុគន្ធកញ្ញា នៅតែមិនទាន់អាចធ្វើបានដូច យក់ ថិតរដ្ឋា ឲ្យមានរូបរាងស្វែលដូចដើមឡើយ បើទោះជាបានសម្រាលកូនប្រុសទី២ តាំងពីខែមីនា ឆ្នាំ២០២៤ ក្ដី ប៉ុន្ដែជាងមួយឆ្នាំនេះ សុគន្ធកញ្ញា សម្រកគីឡូអត់បានដូច បំណងឡើយ ។ បញ្ហារាងមិនទាន់ស្វែលនេះហើយ នាំឲ្យសុគន្ធកញ្ញា ពិបាកក្នុងការវាយលុកទីផ្សារចម្រៀងជាថ្មី ព្រោះចុងក្រោយនេះ មិនមានដំណឹងនាងរៀបគម្រោងច្រៀង Solo Concert ជាបន្ដទៀតឡើយ ។
ទោះបីជាយ៉ាងណា សុគន្ធកញ្ញា ដែលមានអំណាចប្រៀបដូចជាថៅកែហង្សមាស និងមានស្វាមី ជាអគ្គនាយកទូរទស្សន៍ហង្សមាស ផងនោះ នាងមិនងាយនឹងធ្លាក់ចុះខ្លាំងរហូតកេរ្ដិ៍ឈ្មោះហៅលែងឮ ដូចតារាមួយចំនួនទៀត ដែលមានស្វាមីនិងកូនហើយ លែងមានទីផ្សារនោះឡើយ ។
អ្នកលេងបណ្ដាញសង្គម បានសំណូមពរឲ្យឱក សុគន្ធកញ្ញា គួរតែប្រញាប់រកវិធីសម្រកគីឡូវិញ ជាបន្ទាន់ ព្រោះមុននេះ យក់ ថិតរដ្ឋា កូន៣នាក់ ឡើងទម្ងន់ដល់ ៦៥គ.ក្រ ប៉ុន្ដែនាងរកវិធីសម្រកបានដល់ទៅ ១៨គ.ក្រ ពោលគឺនៅសល់តែ ៤៧គ.ក្រ ឥឡូវរដ្ឋា មានទីផ្សារចម្រៀងជាថ្មី គេហៅច្រៀងតាម Pub និងក្លឹប ជាបន្ដបន្ទាប់។ ប៉ុន្ដែសម្រាប់សុគន្ធកញ្ញា កូន២នាក់ នាងនៅមិនទាន់ធ្វើបានដូច រដ្ឋា បានទេ បើទោះជាគីឡូនាងមិនទាន់ឈានដល់ដំណាក់កាលប្រកាសអាសន្នក្ដី ។
គួរបញ្ជាក់ថា ឱក សុគន្ធកញ្ញា ត្រូវបានចាត់ទុកជាតារាដែលជោគជ័យទាំងអាជីពចម្រៀង និងស្នេហា ព្រោះក្រោយមានស្វាមី ៦ឆ្នាំ មានកូនប្រុសពីរនាក់ នាងត្រូវលោកអ៊ឹង សុខលី ថ្នាក់ថ្នមទ្វេដង ហើយពេលកញ្ញា ទៅ ណាមកណា ត្រូវបានតារារួមអាជីព ហៅនាង « ជំទាវ» ទៀតផង សុគន្ធកញ្ញា មិនសូវមានបទល្បីៗដូចមុនទេ ហើយដើម្បីទប់ស្កាត់កុំឲ្យនាងធ្លាក់ចុះ ឬឈរនៅតែជាតួឯករបស់ផលិតកម្មរស្មីហង្សមាស នោះ កាលពីខែខែកញ្ញា ឆ្នាំ២០២៤ នាងត្រូវស្វាមីរៀបចំឲ្យច្រៀង Solo Concerts ជាបន្ដបន្ទាប់។ ប៉ុន្ដែនៅចុងឆ្នាំ២០២៥ នេះគ្មានដំណឹងនាងត្រៀមឡើងឆាកច្រៀងម្នាក់ឯង ៣០ទៅ៤០បទនោះទៀតទេ ខណៈដែលក្រោយវិលពីអូស្រា្ដលី កាល ពីដើមខែសីហា នាងបានចុះទៅចែកអំណោយជូនកងទ័ព និងគ្រួសារភៀសសឹក នៅតាមតំបន់ព្រំដែនកម្ពុជា-ថៃ ផងដែរ ។
ប្រភពបានឲ្យដឹងថា ការដែលសុគន្ធកញ្ញា មិនសូវភ័យរឿងគីឡូមិនទាន់ស្រកដូចចិត្តនាពេលនេះ ដោយសាតែបច្ចុប្បន្ន ហង្សមាស លែងមានគូប្រជែងជាមួយនាងទៀតហើយ ក្រោយពីតារាស្រីជើងខ្លាំងៗ ដូចជាពេជ្រ សោភា, សុគន្ធ និសា, វី ឌីណែត, សុខ ស្រីនាង, រ៉េត ស៊ូហ្សាណា, កែវ សុបញ្ញា និងពេជ្រ សូលីកា ជាដើម បានដើរចេញពីទ្រនំធំនេះអស់ទៅហើយ ហេតុនេះបានជាកញ្ញា ជិះសេះលែងដៃតែម្ដង ។ ចំណែកតារាជិតស្និទ្ធសុគន្ធកញ្ញា បង្ហើបថាការមានកូនប្រុសពីរនាក់ សម្រាប់កញ្ញា មិនទាន់គ្រប់គ្រាន់ទេ គឺនាងចង់បានកូនស្រីម្នាក់ ទៀតហើយមិនយូរទេកញ្ញា នឹងរៀបគម្រោងពពោះកូនទី៣ ។
គេថានៅពេលដែលកញ្ញា ផ្ដោតលើការយកកូនថែម ដើម្បីធ្វើឲ្យគ្រួសារកាន់តែមានភាពកក់ក្ដៅនោះ នាងមិនដាក់គោលដៅប្រជែងអាជីពចម្រៀងដូចមុនទៀតឡើយ ព្រោះពេលនេះ នាងមានអាយុ៣៨ឆ្នាំ ទៅហើយ ៕
