ភ្នំពេញ ៖ នារីម្នាក់សង្ស័យមានវិបត្តិស្នេហា ពេលផឹកស្រាស្រវឹងទោរទន់បានរត់ឡើងទៅស្ពានអាកាសស្ទឹងមានជ័យ ផ្លោះជាន់លើបង្កាន់ដៃស្ពានបម្រុងលោតសម្លាប់ខ្លួន ត្រូវបានអ្នកធ្វើដំណើរតាមផ្លូវជួយឃាត់ទាន់ បង្កឲ្យមានការភ្ញាក់ផ្អើលកាលពីវេលាម៉ោង១១យប់ ថ្ងៃទី២៧ ខែសីហា ឆ្នាំ២០១៧ នៅលើស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ ខណ្ឌមានជ័យ ។
នារីដែលបម្រុងលោតសម្លាប់ខ្លួន មិនត្រូវបានស្គាល់អត្តសញ្ញាណ មានអាយុជាង២០ឆ្នាំ ស្នាក់នៅ មិនប្រាកដ។
តាមសម្តីបងប្អូនប្រជាពលរដ្ធដែលឃើញហេតុការណ៍បានឲ្យដឹងថា មុនពេលកើតហេតុ ពួកគាត់បានធ្វើដំណើរតាមផ្លូវឆ្លងកាត់ស្ពានអាកាសស្ទឹងមានជ័យ ស្រាប់តែឃើញនារីម្នាក់បានស្រែកយំរវើរវាយ ហើយបានកាន់បង្កាន់ដៃស្ពានឡើងលើបង្កាន់ដៃស្ពាន គោលបំណងលោតសម្លាប់ខ្លួន ខណៈពេលនោះ ពួកគាត់បាននាំជួយនិយាយលួងលោម ហើយបានស្ទុះទៅចាប់នារីរូបនោះ អោយចុះពីលើបង្កាន់ដៃស្ពានមកក្រោមវិញ ។
ប្រភពដដែលបានបន្តទៀតថា បន្ទាប់ពីឃាត់នារីរូបនោះក្នុងខ្លួនរបស់នាងមានធំក្លិនស្រាហួងហើយពួកគាត់បានផ្តល់ដំណឹងទៅដល់សមត្ថកិច្ចឲ្យចុះមកមើល ខណៈពេលនោះសមត្ថកិច្ចមកដល់ ក៍ស្រាប់តែមានបុរសចំណាស់ម្នាក់បានអះអាងថាជាឪពុក បានមកជួយនិយាយលួងលោមឲ្យនារីម្នាក់នោះស្ងប់អារម្មណ៍ រួចហើយបានបីយកទៅផ្ទះបាត់នៅក្បែរនោះ ។
ពាក់ព័ន្ធនឹងករណីខាងលើនេះ សមត្ថកិច្ចសង្ស័យថា មានវិបត្តិស្នេហា ទើបធ្វើឲ្យនារីខាងលើ ផឹកស្រាស្រវឹង ហើយមានបំណងរត់ទៅលោតពីលើស្ពានអាកាសស្ទឹងមានជ័យសម្លាប់ខ្លួនបែបនេះ ៕
