ភ្នំពេញ៖ បុរសម្នាក់បើករថយន្តកុងតឺន័រដឹកទំនិញមកពីកំពង់សោម យកមកទម្លាក់នៅម្តុំផ្សារតាប៉ាង មកដល់ចំណុចផ្លូវបត់ស្តាំអត់ផុត ដោយសារមានរថយន្ត២គ្រឿង ចតនៅតាមចិញ្ចើមផ្លូវ រថយន្តកុងតឺន័របានបើកថយក្រោយបន្តិច ដើម្បីបត់ម្តងទៀត ធ្វើឲ្យបុកដំបូលសំយ៉ាបផ្ទះប្រជាពលរដ្ឋ ធ្វើឲ្យខូចខាត តែមិនមានរងរបួសទេ ហេតុការណ៍នេះបានកើតឡើងកាលពីវេលាម៉ោង១០នឹង៣០នាទីយប់ ថ្ងៃទី២៩ ខែសីហា ឆ្នាំ២០១៧ តាមបណ្តោយផ្លូវ១៤៤ កែងផ្លូវ៤៩ នៅចំណុចម្តុំផ្សារតាប៉ាង ស្ថិតនៅក្នុងសង្កាត់ផ្សារថ្មី៣ ខណ្ឌដូនពេញ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តកុងតឺន័រ ម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3D-4819 ដឹកទំនិញមកពីកំពង់សោម យកមកទម្លាក់នៅម្តុំផ្សារតាប៉ាង បានធ្វើដំណើរតាមបណ្តោយផ្លូវ១៤៤ ក្នុងទិសដៅពីកើតទៅលិច ខណៈពេលមកដល់ចំណុចកើតហេតុបានបត់ស្តាំទៅតាមផ្លូវ៤៩ ប៉ុន្តែបត់អត់កើតដោយសារតែមានរថយន្តនៅពីមុខចំនួន២គ្រឿងទៀត ដែលចតនៅតាមចិញ្ចើមផ្លូវ ទើបរថយន្តកុងតឺន័របានបើកថយក្រោយបន្តិច ដើម្បីបត់ម្តងទៀត ខណៈពេលបើកថយក្រោយមិនបានប្រយ័ត្ន ក៏ជ្រុលទៅបុកដំបូលសំយ៉ាបផ្ទះខាងមុខ បណ្តាលឲ្យបាក់អស់មួយដុំ ។
ក្រោយពេលកើតហេតុភាគីទាំងសងខាងបានធ្វើការចរចាគ្នា ដោយខាងរថយន្តកុងតឺន័រសងខាងម្ចាស់ដំបូលផ្ទះ ចំនួន200$ ដើម្បីបញ្ចប់រឿងនៅនឹងកន្លែងកើតហេតុ ៕
