កាលពីថ្ងៃទីពុធ ទី4 ខែកក្កដា ឆ្នាំ2018 កីឡាករប្រធានក្រុមជម្រើសជាតិនីហ្សេរីយ៉ា បានអំពាវនាវឱ្យអាជ្ញាធររបស់លោកពង្រឹងសន្តិសុខឡើងវិញ បន្ទាប់ពីឪពុករបស់លោកត្រូវគេចាប់ជំរិត2ដង ក្នុងរយៈពេល7ឆ្នាំចុងក្រោយនេះ។ ទោះជាយ៉ាងណាក្តី ឪពុករបស់លោកត្រូវបានដោះលែងវិញហើយ កាលពីដើមសប្តាហ៍នេះ។
Mikel បាននិយាយថា ឪពុករបស់លោកត្រូវបានគេចាប់ជំរិតកាលពីថ្ងៃទី26 ខែមិថុនា ឆ្នាំ2018 នៅក្នុងទីក្រុង Enugu រយៈពេល4ម៉ោង មុនពេលដែលក្រុមនីហ្សេរីយ៉ា ចាញ់ក្រុមអាហ្សង់ទីន ដោយលទ្ធផល 2-1។
លោកបានបន្តទៀតថា នេះជាលើកទី2 ដែលឪពុករបស់លោកត្រូវបានចាប់ជំរិត។ ប្រសិនបើសន្តិសុខនៅក្នុងប្រទេសនីហ្សេរីយ៉ា នៅតែទន់ខ្សោយបែបនេះ វាប្រាកដណាស់ថា ថ្ងៃណាមួយ ខ្ញុំនឹងបាត់បង់ឪពុករបស់ខ្ញុំ។ ថ្ងៃនេះ វាកើតឡើងចំពោះឪពុកខ្ញុំ ហើយថ្ងៃស្អែកវានឹងកើតឡើង ចំពោះឪពុករបស់អ្នកផ្សេង រស់នៅក្នុងប្រទេសនីហ្សេរីយ៉ា វាគួរឱ្យភ័យខ្លាចខ្លាំងណាស់៕
