គិតត្រឹមវគ្គ១៦ក្រុម កីឡាករ Harry Kane កំពុងតែនាំមុខគេក្នុងការស៊ុតបាល់បញ្ចូលទី នៅព្រឹត្តិការណ៍ប្រកួតបាល់ទាត់ពិភពលោក២០១៨ នៅប្រទេសរុស្ស៊ី។
កីឡាករ Harry Kane កំពុងស្ថិតនៅលើកំណាត់ផ្លូវឆ្ពោះទៅរកស្បែកជើងមាស ប្រសិនបើគេអាចឆ្លងផុតឧបសគ្គក្រុមខ្លាំង ស៊ុយអែត។
៤ប្រកួតកន្លងមក ខ្សែប្រយុទ្ធមាន់ខ្នាយមាស Harry Kane ចូលលេងបាន២៧៣នាទី ស៊ុតបញ្ចូលទីបាន៦គ្រាប់ គិតជាមធ្យម៤៦នាទី ក្នុង១គ្រាប់។
ខ្សែប្រយុទ្ធដែលជាគ្រាប់ពូជថ្មីរបស់ក្រុមជម្រើសជាតិតោកំណាចអង់គ្លេស រូបនេះ ស៊ុតបាន៨ជើង ចំគោលដៅ៦ដង ស្មើនឹង៧៥ភាគរយ។
ចំណែកឯកីឡាករដែលរកគ្រាប់បាល់បានច្រើនគ្រាប់ដែរ រួមមាន ខ្សែប្រយុទ្ធស្បែកខ្មៅ Romelu Lukaku ឈរលំដាប់លេខ២ ស៊ុតបាល់បញ្ចូលទីបាន៤គ្រាប់ ស្មើនឹងកីឡាករខ្សែប្រយុទ្ធ រ៉ូណាល់ដូ ក្រុមជម្រើសជាតិព័រទុយហ្គាល់ ដែលបានធ្លាក់ទៅហើយ នាំមុខកីឡាករខ្សែប្រយុទ្ធ Dzyuba ក្រុមម្ចាស់ផ្ទះរុស្ស៊ី ដែលរកបាន៣គ្រាប់៕
