តាមប្រភពព័ត៌មានពីគេហទំព័រផ្លូវការរបស់ក្លឹប Leverkusen ចេញផ្សាយនៅថ្ងៃចន្ទនេះ បានឲ្យដឹងថា ក្លឹបបានយល់ព្រមបន្តកុងត្រាថ្មីឲ្យកីឡាករខ្សែបម្រើ Leon Baily មុនការចាប់ផ្តើមបើករដូវកាលថ្មី។
កីឡាករវ័យ២១ឆ្នាំ ដែលបានកុងត្រាបច្ចុប្បន្នត្រូវអស់សុពលភាពត្រឹមឆ្នាំ២០២២ ទទួលបានកុងត្រាថ្មី រយៈពេល១ឆ្នាំ បន្ថែមទៀត គឺរហូតដល់ឆ្នាំ២០២៣។
លោកJonas Boldt នាយកក្លឹបLeverkusen បាននិយាយថា “កាលពីប៉ុន្មានខែមុន មានព័ត៌មានចចាមអារ៉ាមថា កីឡាករ Leon គ្រោងនឹងចាកចេញពីក្លឹបនេះ ប៉ុន្តែក្រោយមក គាត់ក៏ប្តូរចិត្តវិញ ដោយសារតែគាត់យល់ឃើញថា គាត់អាចផ្ញើវាសនា និងអភិវឌ្ឍ អាជីពបាល់ទាត់បាន”។
Bailey បានចូលរួមជាមួយក្លឹប Leverkusen កាលពីឆ្នាំ២០១៧ ក្រោយផ្ទេរមកពីក្លឹបបាល់ទាត់ Genk ។ នៅជាមួយក្លឹបនេះ ធ្លាប់ស៊ុតបាល់បាន១២គ្រាប់ ក្នុងការបង្ហាញវត្តមាន៤៤ប្រកួត។
ក្លឹបLeverkusen បើកឆាកដំបូងត្រូវជួបជាមួយក្រុម Monchen Gladbach នៅថ្ងៃទី ២៥ សីហា ២០១៨៕
