ស្រីស្អាតសុខ ពិសី បានឡើងឆាកតន្រ្ដីចាប់ដៃជាមួយកំពូលតារាចម្រៀងព្រាប សុវត្ថិ ជាលើកទី២ កាលពីថ្ងៃសៅរ៍ ទី១០ ខែកក្កដា ឆ្នាំ២០២០ ហើយអ្នកទាំង២បានច្រៀងឆ្លើងឆ្លើយគ្នាបទ”សំណាបយើងដី”។
នេះជាការជួបគ្នាម្ដងទៀត ខណៈដែលកាលពីខែមុន អ្នកទាំង២បានច្រៀងដៃគូឆ្លងឆ្លើយគ្នាម្ដង ហើយតាមរយៈបទ ”ប្រសា្ន៤ខ” ហើយពិសី អៀនខ្លាំងណាស់ នៅពេលដែលលោកព្រាប សុវត្ថិ និយាយលេបខាយដាក់នាងបែបលេងសើចនោះ។ ប៉ុន្ដែការច្រៀងប៉ះគ្នាតាមកម្មវិធីឆាកតន្ត្រីផ្សេងៗ ពិសី ធ្លាប់ប្រាប់ថា នាងបានជួបរៀមច្បងព្រាប សុវត្ថិ ជាច្រើនលើកច្រើនសារមកហើយ។
សុខ ពីសី មានដៃគូស្និទ្ធស្នាលបំផុត គឺតារាចម្រៀងខេម ប៊ុនថៃ ហៅខេមរៈ សិរីមន្ដ ប៉ុន្ដែតាំងពីលោកប៊ុនថៃ ស្ពាយបង្វេចទៅហង្សមាសនោះនាងបានចាប់ដៃជាមួយតារាចម្រៀងឆាយ វីរៈយុទ្ធ , ខាន់ ជែមស៍ និងនាយចឺម ជាដើម។ នាងថា មិនប្រកាន់ដៃគូថា មួយណានោះទេ ឲ្យតែផលិតកម្ម ឬម្ចាស់កម្មវិធីតម្រូវគឺនាងអាចច្រៀងសម្ដែងបានទាំងអស់។
ដោយឡែក ទាក់ទងការច្រៀងឆ្លើយឆ្លើយជាមួយលោកព្រាប សុវត្ថិ និងខេមរៈ សិរីមន្ដ វិញ នាងថា ពេញចិត្តដូចគ្នា។
សុខ ពិសី ជាតារាស្រីដែលមានមានរូបសម្រស់លេចធ្លោខ្លាំង ទើបនាងត្រូវប៉ាន់តាមបណ្ដាស្ពតពាណិជ្ជកម្មធំៗទាំងឡាយ រត់រកនាងធ្វើជាតំណាង។
ចំណែកទាក់ទង VIVO វិញ នាងថានៅសល់កុងត្រាជាមួយក្រុមហ៊ុននេះ ១ឆ្នាំទៀត គឺមានន័យថា នាងអាចច្រៀងសម្ដែងជាមួយព្រាប សុវត្ថិ ជាលើកទី៣ឬទី៤ផងដែរ នាពេលខាងមុខនេះ។ ចំពោះរឿងស្នេហាជាមួយថៅកែផលិតកម្មសាន់ដេ លោកឡាយ សុខចំរើន វិញ បើទោះជាលេចឮជាច្រើនឆ្នាំមកហើយក្ដី ប៉ុន្តែពេលនេះ អ្នកទាំង២មិនដែលសារភាពស្នេហ៍ឡើយ ទើបធ្វើឲ្យដំណឹងរៀបការនៅតែស្ងាត់សូន្យឈឹង៕
