ខេត្តកោះកុង ៖ ក្មេងស្រី ១ក្រុម បានវាយតប់គ្នាទៅវិញទៅមក មានអ្នកឈរចាំថតវីដេអូសកម្មភាព យកទៅបង្ហោះក្នុងបណ្តាញសង្គម បង្កឱ្យមានការរិះគន់យ៉ាងខ្លាំង និងត្រូវបានសមត្ថកិច្ចចុះស្រាវជ្រាវឃាត់ខ្លួនបាន ចំនួន៧នាក់ នាំយកទៅសាកសួរ។
ការឃាត់ខ្លួនក្មេងស្រី ចំនួន៧នាក់ មកសាកសួរនេះ បានធ្វើឡើង កាលពីថ្ងៃទី២៧ ខែវិច្ឆិកា ឆ្នាំ២០២៥ នៅអធិការដ្ឋាននគរបាលស្រុកស្រែអំបិល។
តាមប្រភពសមត្ថកិច្ចស្រុកស្រែអំបិល បានឱ្យដឹងកាលពីព្រឹកថ្ងៃទី២៨ ខែវិច្ឆិកា ឆ្នាំ២០២៥ ថា ដោយអនុវត្តតាមបទបញ្ជាដ៏ខ្ពង់ខ្ពស់របស់លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង និងតាមការចង្អុលបង្ហាញរបស់លោក ជា ច័ន្ទកញ្ញា អភិបាលស្រុក និងជាប្រធានគណ:បញ្ជាការឯកភាពស្រុកស្រែអំបិល នៅថ្ងៃទី២៧ ខែវិច្ឆិកា ឆ្នាំ២០២៥ លោកវរសេនីយ៍ទោ ដូង វណ្ណា អធិការនគរបាលស្រុកស្រែអំបិល បានបញ្ជាផ្នែកជំនាញព្រហ្មទណ្ឌ ដឹកនាំដោយលោកវរសេនីយ៍ទោ ផេង អង្គារសំរេច អធិការរង ធ្វើការស្រាវជ្រាវរកក្រុមយុវតីដែលបានបង្កហិង្សានៅវត្តស្រែអំបិល តាមឃ្លីបវីដេអូ ដែលត្រូវបានបង្ហោះដោយឈ្មោះ គង់ វុទ្ធី និងត្រូវបានចែកចាយនៅលើបណ្តោញសង្គម ហ្វេសប៊ុក យកមកសាកសួរបំភ្លឺ។
បន្ទាប់ពីនាំក្មេងស្រីទាំង៧នាក់ ខាងលើ យកមកធ្វើការសាកសួររួចហើយ សមត្ថកិច្ច បានធ្វើការអប់រំ ណែនាំ ធ្វើកិច្ចសន្យា រួចទាក់ទងហៅអាណាព្យាបាល មកធានាទទួលយកទៅអប់រំបន្ត៕
