ភ្នំពេញ ៖ បុរសជាប្រធានទីផ្សារលក់ស្រាបៀរគ្រប់មុខម្នាក់ ត្រូវបានម្ចាស់បណ្តឹងឃាត់ខ្លួនយកទៅប្រគល់ឲ្យសមត្ថកិច្ចផ្សារដើមថ្កូវ សាកសួរ បន្ទាប់ពីជនសង្ស័យម្នាក់នោះបានធ្វើសកម្មភាពរំលោភលើទំនុកចិត្ត ដោយបានលួចយកលុយពីក្រុមហ៊ុនអស់ជាង៤ម៉ឺនដុល្លារ យកទៅលេងល្បែងអស់ ត្រូវបានឃាត់ខ្លួននៅវេលាម៉ោង៥និង៣០នាទីល្ងាច ថ្ងៃទី១៤ ខែកញ្ញា ឆ្នាំ២០១៧ នៅក្នុងផ្ទះសំណាក់យីហោ បឹងត្របែកមានជ័យ ផ្លូវ៤៧៤ សង្កាត់បឹងត្របែក ខណ្ឌចំការមន។
ជនសង្ស័យដែលឆបោកយកលុយគេនោះ មានឈ្មោះ អ៊ឹង ឆាយលាង ភេទប្រុស អាយុ៣១ឆ្នាំមុខរបរប្រធានផ្នែកទីផ្សារស្រាបៀរគ្រប់មុខ ស្នាក់នៅផ្ទះលេខ១២៦ ផ្លូវ៣៦៩ ភូមិដើមចាន់សង្កាត់ច្បារអំពៅ២ ខណ្ឌច្បារអំពៅ ។ ចំណែកជនរងគ្រោះជាម្ចាស់ដេប៉ូ មានឈ្មោះ ភាវ ផាន់ណារ៉ា ភេទប្រុស អាយុ៣៨ឆ្នាំ មុខរបរប្រធានគ្រប់គ្រងដេប៉ូផ្ដាច់មុខ ស្នាក់នៅផ្ទះលេខ១០៦ ផ្លូវ៤៥០សង្កាត់ទួលទំពូង១ ខណ្ឌចំការមន។ រីឯប្រាក់ដែលជនសង្ស័យបោកយកទៅសរុបចំនួន៤៤០៥២ដុល្លារ ។
តាមសម្តីជនរងគ្រោះជាម្ចាស់ដេប៉ូបានឲ្យដឹងថា កាលពីថ្ងៃទី០១ ខែមិថុនា ឆ្នាំ២០១៧ បុរសជាជនសង្ស័យខាងលើ បានមកដាក់ពាក្យសុំធ្វើការនៅដេប៉ូចែកចាយស្រាបៀររបស់គាត់ដែលមានទីតាំងផ្ទះលេខ២ នៅផ្លូវ៤៨៤ កែងនិង៩៧ ភូមិ៤ ក្រុម២៨ សង្កាត់ផ្សារដើមថ្កូវ ខណ្ឌចំការមន ឃើញដូចនេះ រូបលោកជាម្ចាស់ដេប៉ូ បានទទួលបុរសម្នាក់នោះឲ្យធ្វើការ ដោយមានតួនាទីជាប្រធានផ្នែកទីផ្សារ ដើរចែកចាយតាមដេប៉ូផ្សេងៗតាមធម្មតា។
ប្រភពដដែលបានបន្តទៀតថា លុះដល់អំឡុងខែកក្កដា ឆ្នាំ២០១៧ បុរសជាជនសង្ស័យរូបនោះបានគេចវេសពីក្រុមហ៊ុន ដោយបានដើរប្រមូលយកលុយតាមដេប៉ូផ្សេងៗ សរុបជាទឹកលុយចំនួន៤៤០៥២ដុល្លារ គេចខ្លួនបាត់ស្រមោលតែម្តង។ ម្ចាស់ដេប៉ូរូបនោះបានឲ្យដឹងទៀតថាដោយសារតែបុរសជាជនសង្ស័យមិនឃើញចូលខ្លួនយកលុយទៅប្រគល់ឲ្យក្រុមហ៊ុនវិញ រូបគាត់ជាម្ចាស់ដេប៉ូបានដាក់កម្លាំងស្វះស្វែងដើររកជនសង្ស័យរូបនោះ រហូតដល់ប្រទះឃើញជនសង្ស័យរូបនោះ បានសម្ងំលាក់ខ្លួននៅក្នុងផ្ទះសំណាក់យីហោ បឹងត្របែកមានជ័យ ក៍បានឃាត់ខ្លួនជនសង្ស័យរូបនោះ យកទៅប្រគល់ឲ្យសមត្ថកិច្ចប៉ុស្តិនគរបាលផ្សារដើមថ្កូវ ដើម្បីធ្វើការសាកសួរតែម្តង។
នៅចំពោះមុខសមត្ថកិច្ចជនសង្ស័យរូបនោះបានសារភាពថា រូបគេពិតជាបោកប្រាស់យកលុយពីក្រុមហ៊ុនជនរងគ្រោះពិតប្រាកដមែន ហើយលុយទាំងនោះ គឺរូបគេបានយកទៅលែងល្បែងអស់ហើយ។
បន្ទាប់ពីសាកសួរជនរងគ្រោះដាក់ពាក្យបណ្តឹងនៅប៉ុស្តិ៍នគបាលផ្សារដើមថ្កូវ ចំណែកជនសង្ស័យវិញ យោងតាមករណីនេះមានទឹកប្រាក់ច្រើនពេក សមត្ថកិច្ចបានបញ្ជូនខ្លួនទៅការិយាល័យព្រហ្មទណ្ឌកំរិតស្រាលនៃស្នងការរាជធានីភ្នំពេញ ដើម្បីធ្វើការសាកសួរបន្ត៕