ភ្នំពេញ ៖ បុរសម្នាក់សង្ស័យបែកថ្នាំ ខឹងសុំលុយប្រពន្ធអត់បាន ជិះម៉ូតូឌុបទៅលោតពីលើផ្ទះជាន់ទី៣ បណ្តាលឲ្យរងរបួសជើងទាំងសងខាង ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី១២ ខែវិច្ឆិកា ឆ្នាំ២០១៧ តាមបណ្តោយផ្លូវ109 នៅចំណុចក្រោយទីស្តីការគណៈរដ្ឋមន្ត្រី ស្ថិតនៅក្នុងភូមិ៧ ក្រុម៤៧ សង្កាត់មិត្តភាព ខណ្ឌ៧មករា។
តាមប្រភពពត៌មានពីប្រជាពលរដ្ឋជុំវិញកន្លែងកើតហេតុ បានឲ្យដឹងថា មុនពេលកើតហេតុគេបានឃើញបុរសម្នាក់មិនស្គាល់អត្តសញ្ញាណ មានអាយុប្រមាណជា២៦ទៅ២៧ឆ្នាំ ស្នាក់នៅម្តុំផ្សារសាមគ្គី សង្ស័យបែកថ្នាំ មិនដឹងថា ជិះមកពីណានោះទេ បានជាជិះម៉ូតូឌុបមកដល់ចំណុចកើតហេតុ មិនបានឲ្យលុយថ្លៃម៉ូតូឌុបផង ក៏បានចុះពីលើម៉ូតូរត់ឡើងទៅលើផ្ទះមួយគ្មានលេខ នៅជាន់ទី៣ ហើយបានលោតចុះមក សំណាងល្អដែលមិនរងគ្រោះថ្នាក់ដល់ស្លាប់ទេ គ្រាន់តែរងរបួសជើងទាំងសងខាងតែប៉ុណ្ណោះ ។
ក្រោយពេលកើតហេតុសមត្ថកិច្ចសួរនាំទៅ ទើបជនរងគ្រោះប្រាប់លេខអ្នកផ្ទះទៅសមត្ថកិច្ចហើយសមត្ថកិច្ចបានទំនាក់ទំនងទៅសួរនាំសាច់ញាតិ ទើបដឹងថា ជនរងគ្រោះទើបនឹងមកពីខេត្ត មកដល់ភ្នំពេញ បានទៅសុំលុយប្រពន្ធទុកសម្រាប់ដើររកការងារធ្វើ តែប្រពន្ធអត់ឲ្យ ទើបធ្វើឲ្យបុរសខាងលើតូចចិត្ត និងដើររកការងារធ្វើអត់បានផង ក៏បែកគំនិតជិះម៉ូតូឌុបទៅ លោតពីលើផ្ទះជាន់ទី៣សម្លាប់ខ្លួនតែម្តង ។
ក្រោយពេលកើតហេតុរថយន្តសង្គ្រោះរបស់មន្ទីរពេទ្យសម្តេចឪ បានមកដល់ ដឹកយកជនរងគ្រោះយកទៅព្យាបាលនៅមន្ទីរកាល់ម៉ែត៕
