សំណើសុំធ្វើម្ចាស់ផ្ទះរបស់ប្រទេសម៉ារ៉ុក ត្រូវបានសហព័ន្ធបាល់ទាត់អន្តរជាតិ FIFA ទទួលយកទៅពិនិត្យហើយ ប៉ុន្តែអាចប្រឈមមុខនឹងសហម្ចាស់ផ្ទះម៉ិកស៊ិក កាណាដា និងសហរដ្ឋអាមេរិក ដែលជាគូប្រជែង។
នៅក្នុងការធ្វើតេស្តសាកលល្បងរបស់ FIFA ប្រទេសម៉ារ៉ុក ទទួលបាន២,៧ពិន្ទុ ខណៈការដេញថ្លៃរបស់សហម្ចាស់៣ប្រទេស ទទួលបាន៤ពិន្ទុ ហើយមិនមានហានិភ័យច្រើន ដូចម៉ារ៉ុក នោះទេ។
FIFA បាននិយាយថា ក្នុងចំណោមពហុកីឡដ្ឋានទាំង១៤ ដែលដាក់ស្នើដោយប្រទេសម៉ារ៉ុក មានពហុកីឡដ្ឋាន៩ មិនទាន់បានសាងសង់នៅឡើយ ខណៈពហុកីឡដ្ឋាន៥ទៀត ត្រូវការជួសជុលនិងកែលម្អឡើងវិញ។ ជាមួយគ្នានេះដែរ មានតែពហុកីឡដ្ឋាន២ប៉ុណ្ណោះ ដែលមានបំពាក់គ្រឿងបរិក្ខារគ្រប់គ្រាន់ត្រូវតាមស្តង់ដាររបស់ FIFA។
ទោះជាយ៉ាងណក្តី FIFA បាននិយាយថា រដ្ឋាភិបាលប្រទេសនេះ បានធានាថា ពហុកីឡដ្ឋានទាំង១២ នឹងត្រូវបានមានបរិក្ខារគ្រប់គ្រាន់សមស្របតាមស្តង់ដាររបស់ FIFA។
ប្រទេសម៉ារ៉ុក បាននិយាយថា គេនឹងត្រៀម១៦ពាន់លានដុល្លារ សម្រាប់ការសាងហេដ្ឋារចនាសម្ព័ន្ធ ទទួលក្រុមជម្រើសជាតិ ដែលគ្រោងនឹងពង្រើកទៅដល់៤៨ប្រទេស។
ប្រទេសម៉ារ៉ុក បរាជ័យ៤ដងហើយ នៅក្នុងការដេញថ្លៃធ្វើម្ចាស់ផ្ទះការប្រកួតបាល់ទាត់ពិភពលោក កាលពីឆ្នាំ១៩៩៤,១៩៩៨, ២០០៦ និង២០១០៕