ខេត្តបាត់ដំបង ៖ អតីតយុទ្ធជន ៤០គ្រួសារ នៅខេត្តបាត់ដំបង ទទួលបានដីនិងផ្ទះ ពីរាជរដ្ឋាភិបាល តាមរយៈសមាគមអតីតយុទ្ធជនកម្ពុជា។
តាមប្រភពរដ្ឋបាលខេត្តបាត់ដំបង បានបញ្ជាក់ឱ្យដឹងថា កាលពីថ្ងៃទី២៨ ខែសីហា ឆ្នាំ២០២៥ លោកបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញជាអធិបតីក្នុងពិធីបើកការដ្ឋានស្ថាបនាផ្លូវ សម្ពោធដាក់ឱ្យប្រើប្រាស់ស្រះទឹក ប្រគល់ផ្ទះនិងដីឡូត៍ដែលជាអំណោយដ៏ថ្លៃថ្លារបស់សម្តេច ហ៊ុន ម៉ាណែត នាយករដ្ឋមន្ត្រី និងជាអនុប្រធានទី១ សមាគមអតីតយុទ្ធជនកម្ពុជា ជូនអតីតយុទ្ធជន ចំនួន៤០គ្រួសារ នៅតំបន់ដីសម្បទានសង្គមកិច្ច ក្នុងភូមិគោករកា ឃុំដូនបា ស្រុកគាស់ក្រឡ ខេត្តបាត់ដំ បង។ ពិធីនេះមានអញ្ជើញចូលរួមពីអ្នកពាក់ព័ន្ធ និងអតីតយុទ្ធជនសរុបចំនួន ៣៥០នាក់។
ក្នុងឱកាសនោះ លោក គន់ គីម បាននាំយកនូវប្រសាសន៍ផ្តាំផ្ញើសាកសួរសុខទុក្ខនិងសេចក្តីនឹករលឹកពីសម្តេច ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត សម្តេច ហ៊ុន ម៉ាណែត នាយករដ្ឋមន្ត្រី និងលោកស្រីបណ្ឌិត ជូនដល់អតីតយុទ្ធជន។ ជាមួយនេះ លោកក៏បានណែនាំដល់អតីតយុទ្ធជន ត្រូវខិតខំដាំដុះ បង្កបង្កើនផល និងចិញ្ចឹមសត្វ ដើម្បីផ្គត់ផ្គង់ជីវភាពរស់នៅប្រចាំថ្ងៃ។
អតីតយុទ្ធជន បានថ្លែងអំណរគុណចំពោះសម្តេច ហ៊ុន សែន និងសម្តេច ហ៊ុន ម៉ាណែត ដែលបានផ្តល់ដីនិងផ្ទះ ព្រមទាំងបានផ្តល់ការយកចិត្តទុកដាក់គ្រប់បែបយ៉ាងចំពោះអតីតយុទ្ធជនតាំងពីដើម រហូតមកដល់ពេលបច្ចុប្បុន្ននេះ។
គួរបញ្ជាក់ថា បច្ចុប្បន្នអតីតយុទ្ធជននៅក្នុងខេត្តបាត់ដំបង មានជាង ១៤ ០០០នាក់ ក្នុងនោះបានចូលជាសមាជិកសមាគមអតីតយុទ្ធជនកម្ពុជា ចំនួនជាង ១១ ៨០០នាក់ ដោយទទួលបានការយកចិត្តទុកដាក់ខ្ពស់ពីរាជរដ្ឋាភិ បាលកម្ពុជា។ អតីតយុទ្ធជន ចំនួន១០៤គ្រួសារ បានទទួលផ្ទះ ចំនួន១០៤ខ្នង ផ្ទះលើដីសម្បទានសង្គមកិច្ចនៅស្រុកគាស់ក្រឡ ដែលជាអំណោយដ៏ថ្លៃថ្លារបស់សម្តេច ហ៊ុន សែន និងនៅថ្ងៃនេះ អតីតយុទ្ធជនចំនួន៤០គ្រួ សារ បន្ថែមទៀត បានទទួលផ្ទះនិងដីឡូត៍ ដែលជាអំណោយដ៏ថ្លៃថ្លារបស់សម្តេច ហ៊ុន ម៉ាណែត នាយករដ្ឋ មន្ត្រី និងជាអនុប្រធានទី១ សមាគមអតីតយុទ្ធជនកម្ពុជា៕